„Þetta eru svo sannarlega skrítnir tímar. Að vera vinna uppá smitsjúkdómadeild á þessum tíma fyllir mig miklu stolti og gleði að vissu leyti. Af því ég treysti mér til og vil gefa mig alla í að sinna þessum skjólstæðingahóp, alveg eins og öðrum skjólstæðingum. Það hlýtur að vera erfitt að vera í þeirra sporum þar sem við komum alltaf upp klædd eins og geimfarar inn til þeirra,“ þetta skrifar Sólveig Gylfadóttir hjúkrunarfræðingur á smitsjúkdómadeild Landspítalans á Facebook í dag.
Hún segist reyna eftir bestu getu að vera upplífgandi, gleðja, sýna samhygð og hlýju ásamt því að láta skjólstæðinga sína vita að hún sé til staðar fyrir þá sama hvað.
„Ég elska vinnuna mína ólýsanlega mikið, hún er gefandi, krefjandi, erfið á tímum og viðurkenni að ég hef stundum grátið, við megum ekki gleyma að við erum mennsk,“ segir hún jafnframt.
Hún vinnur eins mikið og hún getur núna því hún veit að samfélagið þarf á heilbrigðisstarfsfólki að halda um þessar mundir. Þess á milli hvílir hún sig og reynir að njóta með 11 mánaða gamalli dóttur sinni. „Ég er dugleg að sleppa mér og gleyma mér í að dansa um gólf og syngja barnalög með henni, hugleiða og fara í göngutúra með hundinn minn. Ég tók sjálf ákvörðun um að hitta ekki vini né fjölskyldu á meðan þetta gengur yfir. Ég hitti jú maka minn, dóttur og stjúpson en ekki foreldra mína, aðra fjölskyldumeðlimi, né vini mína. Þar sem ég er í framlínu get ég ekki verið að veikjast og tek ekki áhættu þar sem ég er að sinna jákvæðum covid19 sjúklingum að ef ég er smituð að ég fari að smita aðra,“ skrifar Sólveig.
Hún segir að hjúkrun sé lífsstíll. Hjúkrunarfræðingar fórna ýmsu fyrir vinnuna. Þeir loka sig sjálfir frá félagslífi, koma til baka þegar á reyni og samfélagið þarf á þeim að halda. „Og ekki má gleyma að hjúkrunarfræðingar eru samningslausir. Þessi mikilvæga stétt gerir allt fyrir samfélagið en ríkið getur ekki séð sóma sinn í að semja um mannsæmandi laun fyrir ábyrgð, tryggð og þá ástríðu sem hjúkrunarfræðingar leggja í störf sín. Eitt sem ég veit er að ef ekki verður samið til hins betra mun verða flótti úr stéttinni.“
Hún segir starfsfólk smitsjúkdómadeildar vera þvílíkar hetjur sem þurfa aðlaga sig allskonar breytingum þessa daganna. „Það er ótrúlegt hvað allir eru tilbúnir að leggja mikið á sig til að þetta gangi nú allt vel. Ég er svo ólýsanlega stolt að vinna á þessari deild. Auðvitað er enn mikil óvissa hvað verður og hversu margir veikjast alvarlega og þurfa innlögn.“
Hún bendir á að samkvæmt alþjóðaheilbrigðismálastofnuninni er árið 2020 er tileinkað hjúkrunarfræðingum og ljósmæðrum. „Hver hefði trúað því að við fengjum svona mikilvægt verkefni að vinna. Við erum hér fyrir þig,“ skrifar hún að lokum.“