„Þetta er svo ógeðslegt að það nær engri átt,“ segir Sólveig Anna Jónsdóttir, formaður Eflingar, um mál egypsku fjölskyldunnar sem vísað var úr landi í morgun.
Um fátt hefur verið meira rætt undanfarna daga en mál fjölskyldunnar, hjónanna með fjögur ung börn, sem dvalið hafa á Íslandi í rúm tvö ár. Fjölskyldan hafði komið sér vel fyrir hér á landi og voru börnin til dæmis búin að eignast vini og læra íslensku.
Sólveig Anna segir að erlendir stór-kapítalistar komist upp með að kaupa land í stórum stíl í gegnum eignarhaldsfélög á sama tíma og þvingaðri brottför er beitt gegn fjórum aðfluttum börnum. Enginn hafi í raun yfirsýn yfir það landsvæði sem þessir erlendu aðilar ná að sölsa undir sig.
„Eignalaust fólk í leit að skjóli, fólk sem vill bara fá agnarlítið pláss til að ala upp börnin sín í samfélaginu okkar þarf að þola að vera rekið burt líkt og þau séu stórhættulegir glæpamenn á meðan við þolum að sjálft landið verði eign einhvers fólks sem kemst upp með hvað sem er í krafti síns auðmagns,“ segir Sólveig Anna á Facebook-síðu sinni og bætir við:
„Chad og Ellen Pike, hvíta og ríka fólkið, háttsettir aðilar í alþjóðlega fjárfestingarheiminum, mega kaupa eins mikið af Íslandi og þeim sýnist en Doaa og Ibrahim sem eiga ekkert nema börnin sín 4 mega ekki einu sinni fá pínkulítið pláss til að þurfa ekki að vera hrædd, þurfa ekki að vera hvergi velkomin. Þetta er svo ógeðslegt að það nær engri átt. Ég fordæmi þau sem taka þátt í að viðhalda þessu ömurlega rugli, arfleið rasisma og heimsvaldastefnu, yfirburðahyggju hvíta kynstofnsins og alvalds hinna auðugu.“
