Sólveig Anna Jónsdóttir, formaður Eflingar, fer hörðum orðum um ritstjórnarpistil Morgunblaðsins í dag og sakar ritstjóra blaðsins um tvískinnung í kjaramálum.
Í pistlinum fagnar ritstjóri Morgunblaðsins nýjum fimm ára kjarasamningum Álversins í Straumsvík við stéttarfélög starfsmanna sem sagt er vera „langur tími fyrir kjarasamninga hér á landi og skapar stöðugleika í rekstri álversins og um leið öryggi fyrir starfsmenn“.
Sólveig segir þetta skjóta skökku við og rifjar upp nýliðna tíma þegar „forsvarsmenn eigenda atvinnutækjanna fóru um alla fjölmiðla æpandi að EKKERT ANNAÐ kæmi til greina en að svíkja gerða Lífskjarasamninga en gildistími þeirra er einmitt nokkuð langur“.
Sólveig vísar þarna í deilur síðasta hausts þegar Samtök Atvinnulífsins og verkalýðsforystan deildu um lífskjarasamninga og sögðu forsendur þeirra brostnar.
„Vitiði hver vildu ekki segja upp hinum löngu samningum? Vinnandi fólk. Og vitiði hvers vegna? Af því að það, vinnandi fólkið, vildi bara fá að hafa örlítinn stöðugleika í lífinu sínu,“ skrifar Sólveig.
Hún segir ritstjóra Morgunblaðsins hafa verið helstu klappstýru „hins tryllingslega háværa minnihluta íslenskra samnings-uppsegjara“ og furðar sig því á því að umræddur ritstjóri sé núna að mæra langa kjarasamninga í pistli sínum.
„Já, kæra fólk, svona bara er þetta; óheiðarleiki sumra ríður ekki við einteyming og þessvegna skiptir svo miklu máli fyrir íslenskt auðvald að eiga sína fjölmiðla og sína ritstjóra; sameinuð í óheiðarleikanum svífast þau einskis og eru bókstaflega ávallt tilbúin til að RÖFLA það sjúka röfl sem þörf er á hverju sinni,“ skrifar Sólveig en endar pistilinn á því að óska starfsmönnum Álversins í Straumsvík til hamingju með nýju kjarasamningana.