Snorri Már Skúlason, fjölmiðlamaður og deildarstjóri upplýsinga- og kynningardeildar ASÍ, segist ekki trúa á tilviljanir. Snorri var í afar áhugaverðu viðtali við Sigurlaugu M. Jónasdóttur í þættinum Segðu mér á dögunum þar sem farið var um víðan völl. Fjallað er um viðtalið á vef RÚV.
Í þættinum sagði Snorri meðal annars frá uppvaxtarárum sínum, fjölmiðlaferlinum, alkóhólismanum og árunum sem friðargæsluliði á Sri Lanka þar sem hann sá afleiðingar morða og sjálfsmorðssprengjuárása í hverri viku.
Snorri ræddi einnig um skilnað sem hann gekk í gegnum árið 2019, en Snorri segist hafa óttast í kjölfarið að verða einmana á efri árum. Ekki leið þó á löngu þar til hann kynntist konu sem er konan hans í dag.
„Ég var ekki marga mánuði aleinn. Það fór í gang ferli sem mér fannst of ótrúlegt til að það gæti verið tilviljun, enda tilviljanir ekki til,“ sagði Snorri um aðdragandann að kynnum þeirra.
Þannig er mál með vexti að Snorri rak augun í mynd af huggulegri konu á Facebook – konu sem hann þekkti ekkert. Á prófílmyndinni var konan að koma í mark eftir einhverskonar utanvegahlaup, sigri hrósandi með hendur upp í loftið.
„Ég hugsaði með mér: Svona konu gæti ég hugsað mér,“ segir Snorri sem segist ekkert hafa vitað um konuna, til dæmis hvort hún ætti mann. Eftir smá eftirgrennslan komst hann að þeirri niðurstöðu að konan ætti sennilega ekki mann. „Þannig að ég geri það sem ég geri nánast aldrei, ég sendi einhverri manneskju sem ég þekki ekki neitt vinabeiðni.“
Svo leið og beið og konan svaraði ekki vinabeiðninni. Þegar vika var liðin ákvað Snorri að draga vinabeiðnina til baka, hann skammaðist sín í rauninni fyrir að hafa sent hana.
„Svo bara gleymdi ég þessu. Þetta var ekkert stórmál. Svo einhverjum mánuðum seinna þá sé ég póst frá henni,“ sagði Snorri en í póstinum sagðist konan sjá að hann hefði sent henni vinabeiðni fyrir einhverjum vikum síðan. Bað konan hann um að senda vinabeiðnina aftur ef hún var ætluð henni.
„Ég fór eitthvað að afsaka mig,“ segir Snorri sem kom hreint fram og sagðist hafa dregið beiðnina til baka þegar hún var ekki búin að svara. „Í framhaldi af þessu hittumst við á kaffihúsi og byrjuðum aðeins að spjalla saman. Þetta fór rólega af stað en við fundum að það var eitthvað þarna. Síðan þá er hún búin að vera hluti af mínu lífi og toga mig út úr mínum þægindaramma trekk í trekk,“ sagði Snorri meðal annars.
Konan hans í dag, Margrét Sæmundsdóttir, er hagfræðingur í Seðlabankanum og jógakennari í aukastarfi og segir Snorri að hún hafi meðal annars dregið hann með sér í jóga og á fjallaskíði. Það er eitthvað sem Snorri hafði ekki áður kynnst.
Hægt er að hlusta á þetta fróðlega viðtal við Snorra hér.