Dæmi eru um að kórónuveirusmit séu að koma upp í litlum hópum sem dreifast síðan hratt manna á milli. Þetta segir Rögnvaldur Ólafsson, aðstoðaryfirlögregluþjónn hjá Almannavörnum, í fréttum RÚV í kvöld.
„Til dæmis amma sem bíður heim til sín börnum og barnabörnum og tengdafólki í kaffi eins og gengur og gerist. Við erum með slatta af fólki sem er komið í einangrun út af því,“ sagði Rögnvaldur.
Ellefu innanlandssmit greindust í gær en þar af voru átta utan sóttkvíar. Rögnvaldur sagði líkur á að svipaður fjöldi hafi greinst í dag en endanlegar tölur þar að lútandi liggja ekki fyrir.
„Við erum búin að standa okkur rosalega vel í góðan tíma og nú erum við að sjá vísbendingu um að við séum að missa það úr höndnum, okkur finnst það grátlegt. Við getum þetta, geymum laufabrauðshittinginn, geyma litlu partýin, reyna að halda okkur í gírnum og þá klárum við þetta,“ sagði Rögnvaldur.