„Skrapp í Smáralind áðan að kaupa mér kaffi. Þar var fullt af fólki í röðum fyrir utan nánast gal tómar búðir. Þessi tíu manna takmörkun óháð stærð er svo gjörsamlega galin hugmynd,“ segir Birgir Örn Guðjónsson lögreglumaður.
Birgir Örn gerir þarna tíu manna fjöldatakmarkanir sem eru í gildi í verslunum að umtalsefni en sitt sýnist hverjum í þeim efnum. Nú eru sífellt fleiri farnir að huga að jólagjafainnkaupum og mynduðust víða langar raðir um helgina fyrir utan verslanir. Birgir Örn var á ferð í Smáralind í gær og voru raðir fyrir utan margar verslanir.
Andrés Magnússon, framkvæmdastjóri Samtaka verslunar og þjónustu, sagði í Morgunútvarpinu á Rás 2 í morgun, að hann hefði áhyggjur af löngum röðum sem gætu myndast við verslanir um næstu helgi. Á föstudag er svokallaður „Black Friday“ sem er einn stærsti dagur í verslun hér á landi – og víða erlendis – á hverju ári. Á mánudag fylgir svo „Cyber Monday“ sem er einnig stór.
„Menn sjá það bara fyrir sér að næsta helgi sem er og verður gífurlega stór verslunarhelgi að þá verða hérna biðraðir út um allar trissur. Það er alveg hreinar línur. Það er þess vegna sem það er svo gífurlega mikilvægt að það verði slakað á þessu sem allra fyrst,“ sagði Andrés.
Færsla Birgis hefur vakið talsverða athygli og ljóst að margir hafa skoðun á málinu. Einn bendir honum á að 90 kílómetra hámarkshraði sé jafn galin hugmynd. Hann þurfi bara að hlýða þríeykinu.
„Nei, þetta er jafn fáránlegt og að hafa 30 km hámarkshraða á Reykjanesbrautinni. Það er einmitt misjafn hámarkshraði eftir vegum.“
Birgir Örn segir að þetta snúist um að takmarka fjölda á ákveðnum stöðum. „Að hafa fimmtíu manns í röð fyrir utan rými þar sem 10 manns nánast týnast í flæmi er bara ekki mjög gáfuleg mannfjöldastjórnun.“
