Grenndargámar Sorpu við Eiðistorg á Seltjarnarnesi voru fjarlægðir í síðustu viku vegna skelfilegrar umgengni við gámana. Eins og sést á meðfylgjandi myndum virðast sumir draga hvaða rusl sem er og skilja það eftir við gámana.
Seltjarnarnesbær greindi frá því á Facebook-síðu sinni í liðinni viku að í ljósi þessa hefði verið ákveðið að fjarlægja gámana – að minnsta kosti tímabundið. Er íbúum bent á að nýta sér Endurvinnslustöð Sorpu við Fiskislóð sem er opin alla daga frá 12 til 18:30.
„Tilgangur gámanna átti að vera aukin þjónusta við bæjarbúa en það hljóta allir að vera sammála um að þessi sóðaskapur og umgengni er engum til sóma hvorki íbúum né bæjarfélaginu. Starfsmenn Þjónustumiðstöðvarinnar hafa ekki undan að hreinsa gámasvæðið og fara með umframruslið sem skilið er eftir í alfaraleið. Sú vinna er eðlilega á kostnað annarra verkefna á vegum þjónustumiðstöðvar bæjarins sem gengur auðvitað ekki!,“ segir í Facebook-færslu Seltjarnarnesbæjar.