Bjarni Halldór Janusson, fyrrverandi varaþingmaður Viðreisnar, átti sæti á Alþingi þegar hin umdeilda atkvæðagreiðsla um tillögu Sigríðar Á. Andersen fór fram um skipun dómara við Landsrétt.
Bjarni, sem var 21 árs á þessum tíma og yngsti þingmaður sögunnar, segir í frétt RÚV að Sjálfstæðisflokkurinn hafi hótað stjórnarslitum ef tillaga hennar yrði ekki samþykkt. Bjarni greiddi með tillögunni og kveðst hann sjá eftir því, en ljóst hafi verið að Sjálfstæðisflokkurinn vildi klára málið mjög hratt.
„Maður veit það bara, það er mjög mikið lagt upp úr hlýðni í Sjálfstæðisflokknum. Sjálfstæðismenn voru ekkert sérlega ánægðir með að það væri verið að gagnrýna þetta,“ hefur RÚV eftir Bjarna sem sjálfur segist hafa viljað samþykkja frávísunartillögu og skoða málið ofan í kjölinn.
Þá segir Bjarni að afstaða þingflokks Viðreisnar hafi verið þannig að þau töldu að hægt væri að treysta Sjálfstæðisflokknum í málinu, enda á þessum tímapunkti starfað með flokknum í ríkisstjórn í ár.
Bjarni minnist sérstaklega þess að þegar hann kaus með tillögunni hafi ónafngreindur þingmaður Sjálfstæðisflokksins komið til hans, tekið í hönd hans og þakkað honum fyrir.
„Hann hafði greinilega vitað að ég væri einn af þeim sem væri á móti þessu. Þá fór ég strax að sjá eftir þessu og hugsaði: „Hvað hef ég gert?“.“
Þá segir Bjarni að hann hafi eftir þetta misst áhugann á þingmennsku. Hann hafði gengið með þann draum í maganum síðan í 10. Bekk að gerast þingmaður en þarna hafi hann áttað sig á því að hann hefði ekki þroskann sem til þyrfti.
„Ef ég hefði haft kjarkinn hefði ég setið hjá og samþykkt frávísunartillöguna.“
