Sjálfstæðisflokkurinn fengi 17 þingmenn ef gengið yrði til Alþingiskosninga í dag samkvæmt nýjum Þjóðarpúlsi Gallup og yrði lang stærstur flokka á þingi. Þar á eftir kæmu Vinstri grænir með níu þingmenn, þá Píratar átta, Framsóknarflokkurinn og Samfylking fengi sjö þingmenn hvor um sig og Viðreisn sex. Miðflokkurinn, sem dalar í fylgi milli mánaða, fengi fimm, Sósíalistaflokkur Íslands, sem er ekki á þingi nú, fengi þrjá og Flokkur fólksins einn þingmann.
VG bætir við sig tveimur prósentustigum milli mánaða en fylgi annarra flokka er nokkuð stöðugt. Nær 24 prósent segjast myndu kjósa Sjálfstæðisflokkinn, tólf prósent Samfylkinguna og Pírata, um tíu prósent Framsóknarflokkinn, tæplega tíu prósent Viðreisn, fimm prósent Sósíalistaflokk Íslands og tæplega fimm prósent Flokk fólksins.
Rúm tíu prósent þeirra sem þátt tóku í Þjóðarpúlsinum tóku ekki afstöðu eða vildu ekki greina frá henni og átta prósent sögðust ætla að skila auðu eða ekki mæta á kjörstað.
Athygli vekur að mun fleiri segjast styðja stjórnarflokkana, 61 prósent, en styðja einhvern stjórnarflokkana. Það eru í heild 48 prósent. Stuðningur við ríkisstjórnina jókst um 0,4 prósentustig milli mánaða.