Ræðuskörungurinn Inga Sæland, formaður Flokks fólksins saknaði vatns í ræðustóli meðan hún hélt þrumuræðu yfir ríkisstjórninni á eldhúsdegi í kvöld.
Þingmenn komu færandi hendi. Forseti þingsins hellti í glas fyrir formann fólksins og kallaði til Hönnu Katrínu Friðriksson, þingkonu Viðreisnar og Katrínu Jakobsdóttur forsætisráðherra til að færa henni vatnið. Það dugði ekkert minna en þverpólitískt samstarf til að væta kverkar málsvara fátæks fólks í landi.
Aðgerðarleysið algert
Inga kvartaði ekki aðeins undan ríkisstjórninni í ræðu sinni í kvöld, heldur einnig þingmönnum annarra flokka. Hún furðaði sig á aðgerðarleysi þeirra. „Það er alveg með ólíkindum að hlusta á þann söng sem ég hef verið að hlusta á hér í kvöld,“ sagði Inga og benti á að þeir talsmenn sem stigið hefðu í pontu hefðu sannarlega haft aðstæður til að breyta hlutunum.
„Við viljum þetta og við viljum hitt, af hverju hefur það þá ekki verið gert,“ spurði Inga og horfði grafalvarleg á þingmenn í salnum.
Ávarpaði hún því næst þjóðina og spurði hvort landsmenn vildu óbreytt ástand sem einkenndist af spillingu og græðgi eða hvort þau vildu breytingu.
„Hvers vegna eru 34 prósent ungra drengja að útskrifast með lélegan lesskilning eða ólæsir eftir tíu ára skólagöngu í grunnskóla? Hvernig í veröldinni á þetta að vera og það hefur bara akkúrat ekkert breyst allt þetta kjörtímabil, þvert á móti.“
Það sé nauðsynlegt að mati Ingu að taka utan um litlu einstaklingana í þjóðfélaginu og hjálpa þeim að læra að lesa. „Hvað er svona flókið við það? Hvernig stendur á að það er hrúgað á þau fullt af námsgögnum, jafnvel erlendum tungumálum, og þau eru ólæs á sitt eigið og svo eru einstaklingar og fólk furðu lostinn yfir vaxandi sálfræðilegum erfiðleikum hjá unga fólkinu okkar.“
Inga Sæland sagðist þurfa vatn í miðri ræðu. @SteingrimurJod, @HannaKataF og @katrinjak græjuðu málið. Eitt af þessum fallegu mómentum á Alþingi 🥰 pic.twitter.com/wQJARStwAT
— María Rut (@mariarutkr) June 7, 2021
