Sjáðu hvað lán Karls hefur hækkað mikið á einu ári: „Ég held bara áfram að hlaupa fyrir bankann minn“

Karl Guðlaugsson tannlæknir varpar ljósi á ótrúlega hækkun á láni sínu nú þegar verðbólga hefur þokast upp á við og stýrivextir hækkað upp úr öllu valdi.

Karl skrifar grein á vef Vísis sem vekið hefur athygli en í henni bendir hann á að heildarskuldir hans og hans litla fyrirtækis sem hann rekur voru 24 milljónir króna árið 2007.

„Ég væri skuldlaus maður í dag ef ekki hefði komið til hrunsins árið 2008 og enduðu skuldir mínar í 45 milljónum haustið 2008. En skítt með það.“

Karl segir að hann sé eins og aðrir hamstrar í millistétt á Íslandi sem búa við íslenska krónu. Var hann búinn að borga skuldir sínar niður á síðasta ári og stóðu þær þá í 35 milljónum króna. Þá ákvað hann að fara í framkvæmdir á húsinu sínu sem metið er á 150 milljónir króna.

„Heildarskuldir mínar og litla fyrirtækisins míns voru því 45 milljónir sumarið 2021 og af þeim greiddi ég 180 þúsund krónur á mánuði. Síðasta afborgun lánsins í nóvember 2022 hljóðaði uppá 290 þúsund krónur á mánuði sem er hækkun upp á 110 þúsund á mánuði, á rétt rúmu ári!“

Karl segist ekki hafa neinar áhyggjur af sér, hamstrinum eins og hann kallar sig.

„Ég held bara áfram að hlaupa fyrir bankann minn sem er með tugi milljarða í vaxtatekjur á þessu ári. Ég þarf ekki að eiga tvo bíla og sel því annan þeirra, ég mun fara sjaldnar út að borða og veiti mér ekki lengur þá ánægju að renna við hjá þeim Sante-mönnum til að kaupa góð vín og fer einni ferðinni sjaldnar á gönguskíði norður.“

Áhyggjur Karls beinast að öðrum en honum sjálfum.

„Ég hef áhyggjur af unga fólkinu sem tók jafnhátt lán og ég til að koma sér þaki yfir höfuðið. Hvorki ég, né þetta unga fólk mun geta hitt seðlabankastjóra og peningastefnunefnd Seðlabankans á Tenerife á næsta ári. Nei í alvöru, hættið að reikna ykkur út í hið óendanlega í excel-skjalinu ykkar og farið að nota heilann og hugsa.“