Svissneski myndatökumaðurinn Stefan Forster bræddi drónann sinn af gerðinni DJI Mavic 2 Pro til þess að ná einstöku myndefni af eldgosinu í Geldingardölum. Myndskeiðið má sjá hér að neðan auk mynda af drónanum og hvernig hann var útleikinn eftir myndatökuna.
Fram kemur í umfjöllun ljósmyndasíðunnar DPReviewað Forster hafi sérstaklega flogið til Íslands og eytt fimm dögum í sóttkví til þess eins að bera eldgosið augum. Forster segist hafa eytt nokkrum dögum og nóttum á svæðinu í þessum tilgangi.
Þar segir að Forster hafi tekið með sér þrjá dróna til verksins. Alla af sömu gerðinni og gríðarlega dýra. Einum hafi hann „fórnað“ fyrir magnað myndskeið hér að neðan.
Hann hafi til vonar og vara tekið upp myndskeið í símanum sínum af upptökunni í drónanum, ef hann hefði glatað drónanum alfarið í eldfjallið. Hann segir að dróninn virki enn til upptöku, en fljúgi hinsvegar undarlega.