Óhætt er að segja að hugmynd þess efnis að stytta verði reist af bandaríska rapparanum Kanye West við Sundlaug Vesturbæjar hafi vakið mikla athygli. Sitt sýnist hverjum um þessa hugmynd sem varð hlutskörpust í hugmyndasamkeppninni Hverfið mitt á vegum Reykjavíkurborgar.
Eins og Hringbraut greindi frá í gær líst sumum ekkert sérstaklega vel á hugmyndina og er Jón Viðar Jónsson, leikhúsgagnrýnandi, í þeim flokki. „Hvað hefur farið úrskeiðis í menningarlegu uppeldi unga fólksins? Er þetta ekki toppurinn á óþjóðlegheitunum?“
Kanye West hefur um árabil verið einn vinsælasti tónlistarmaður heims en hann er líka þekktur sem fráfarandi eiginmaður raunveruleikastjörnunnar Kim Kardashian.
Eiríkur Búi Halldórsson, verkefnastjóri hjá Reykjavíkurborg, sagði í kvöldfréttum RÚV í gærkvöldi að hann gæti ekki útilokað að hugmyndin yrði að veruleika en hann gæti ekki lofað neinu. Nú taki við vinna við að fara yfir allar hugmyndir og sigta út þær sem teljast raunhæfar í framkvæmd.
Jakob Frímann Magnússon, tónlistarmaður og fyrrverandi miðborgarstjóri, sagði á Facebook-síðu sinni í gærkvöldi að hugmyndin væri í senn skemmtileg og súrrealísk. Það myndi spegla dirfsku yfirvalda að veita henni brautargengi.
Margir tjá sig um málið undir færslu Jakobs, þar á meðal sjónvarpsmaðurinn Egill Helgason. Hann veltir því upp hvort ekki mætti frekar reisa styttu af sundkennara eða einum af þeim baðvörðum sem settu svip sinn á Vesturbæjarlaugina um árabil. Sigríður Arnardóttir, eða Sirrý eins og hún er gjanan kölluð, er alls ekki hrifin af hugmyndinni um styttu af Kanye West og segir einfaldlega: „Algjört bull þessi tillaga.“
