Sigurjón M. Egilsson, ritstjóri Miðjunnar, segir að mistök sem Inga Sæland, formaður Flokks fólksins, gerði fyrir síðustu kosningar gætu hreinlega kostað hana flokkinn og þingsætið.
Í pistli á vef Miðjunnar í morgun bendir Sigurjón á að Flokkur fólksins berjist nú fyrir lífi sínu. Nú þegar innan við ár er til kosninga mælist fylgi flokksins rétt innan við fimm prósent eins og í síðustu kosningum. Til að ná manni inn á þing þarf að ná þessu fimm prósenta marki.
„Inga stóð sig vel í aðdraganda síðustu kosninga. Það skilaði henni fjögurra manna þingflokki. Fögnuðurinn stóð ekki lengi. Inga hafði fallið fyrir tveimur útlögum úr Sjálfstæðisflokki, Ólafi Ísleifssyni og Karli Gauta Hjaltasyni. Þeir eru fullkomin andstaða við Ingu og Guðmund Inga Kristinsson,“ segir Sigurjón og bætir við að þingflokkurinn hafi í raun verið klofinn í upphafi. Báðir höfðu þeir Ólafur og Karl setið á þingi í skjóli Ingu þegar þeir tóku að svíkja hana og uppnefna.
„Fari svo, eins og margt bendir til, að Flokkur fólksins nái ekki kjörnum þingmanni verður það fyrst og síðast vegna mistaka Ingu í upphafi. Hún lagði traust sitt á menn gjörólíka henni sjálfri og þá um leið flokknum,“ segir Sigurjón og bætir við að í huga hans komi örlög Flokks fólksins.
„Daginn sem sá flokkur gekk Viðreisn og Sjálfstæðisflokki á hönd var dauðadómurinn kveðinn upp. Mögulega munu mistök Ingu kosta hana flokkinn og þingsætið. Ólafur og Karl Gauti munu hugsanlega halda þingsætum. Það er samt mjög óvíst. Til að það verði verður Miðflokkurinn að gera betur. Sem hann mun reyna. Fylgi hans mældist hvað hæst með meðan málþófið vegna orkupakkann var á dagskrá. Ekki meira um Miðflokkinn.“
Sigurjón segir að ef fer sem horfir verði sjónarsviptir ef Guðmundur Ingi Kristinsson, þingmaður Flokks fólksins, dettur af þingi. Þar sé á ferðinni ötull baráttumaður sem Alþingi þarf á að halda.
„Hið vonlausa veganesti sem Flokkur fólksins, lagði af stað með eyðir jafnvel flokknum,“ segir Sigurjón í lok pistilsins.