„Satt best að segja er alltof langt gengið að eltast við fáránlegan fyrirslátt Brynjar Níelssonar. Ljóst er að Brynjar nennir ekki í vinnuna,“ segir Sigurjón M. Egilsson, ritstjóri Miðjunnar, í pistli sem birtist á vef hans í morgun.
Þar lætur hann Brynjar Níelsson, þingmann Sjálfstæðisflokksins, heyra það en Brynjar hefur legið undir ámæli af ýmsum ástæðum síðustu daga. Í gær var greint frá því að Brynjar hefði ekki mætt á fundi stjórnskipunar- og eftirlitsnefndar Alþingis í rúman mánuð. Hefur hann misst af tíu fundum og raunar óskað eftir því að fá að hætta í nefndinni þar sem hann telur störf hennar vera pólitískan leik.
Sigurjón bendir á að Brynjar sé ekki venjulegur þingmaður sem þarf ekki endilega að vera slæmt.
„En sérstaða Brynjars er honum ekki til framdráttar, ekki flokknum hans og alls ekki Alþingi. Skömm hans er mest vegna framkomu hans við Alþingi Íslendinga,“ segir Sigurjón og bætir við að Alþingi hafi kosið Brynjar til að gegna skyldum sínum sem fulltrúi nefndarinnar.
„Hann vanvirðir þingið með því að hunsa nefndina. Kannski nennir Brynjar ekki í vinnuna sína. Orð hans um starf nefndarinnar eru fullkomlega út í hött. Halda ekki vatni,“ segir hann og telur ljóst að Brynjari langi ekki ekki að vinna í eftirlitsnefnd Alþingis.
„Hann segist sjálfur hafa löngu ákveðið það. – Hann ætti þá bara að segja af sér í stað þess að grafa undan trausti á starfandi nefnd og hleypa að öðrum fulltrúa Sjálfstæðisflokksins sem mætir á fundi til að setja sig inn í mikilvægasta mál samtímans og sinna sínum skyldum að hafa upplýst og málefnalegt eftirlit með sóttvarnaryfirvöldum.“