„Fyrir suma eru sjö þúsund krónur mikill peningur. Sumt fólk er skilið eftir í fátækt,“ segir Sigurjón M. Egilsson, fjölmiðlamaður og ritstjóri Miðjunnar, í pistli sem hann birti á vef sínum í morgun.
Þar segir Sigurjón frá því að fyrir nokkrum árum hafi hann af bríaríi ákveðið að ganga í fjórflokkinn, það er að segja Sjálfstæðisflokk, Framsóknarflokk, Vinstri græn og Samfylkinguna.
„Nú eru í heimabankanum meldingar um tvær greiðslur til Vg. Samtals rúmar sjö þúsund krónur. Vinstri græn, sem og aðrir flokkar sem hafa þingmenn, eiga greiða og óhindraða leið í ríkiskassann. Flokkana vantar enga peninga,“ segir Sigurjón.
„Því hef ég ákveðið að segja mig úr Vinstri grænum í dag. Peningunum hef ég ráðstafað til aðstoðar fátæku fólki. Fólki sem munar mikið um allt,“ segir hann.
Á dögunum var greint frá því að stjórnmálaflokkarnir sem eiga fulltrúa á þingi fái samtals 728 milljóna króna framlag úr ríkissjóði á næsta ári. Sigurjón telur að flokkarnir þurfi ekki meiri peninga og frekar ætti að ráðstafa þeim til fátækra.
„Vinstri græn eru sek. Formaðurinn flokksins boðaði fyrir kosningar að þau sem minnst mega sín ættu ekki að þurfa að bíða eftir réttlætinu. Ríkisstjórn Katrínar er þriggja ára. Og enn bíður fólkið.“
