„Mér finnst lærdómurinn vera nokkuð skýr, að þetta sé ekki leið sem sé skynsamleg úr þessu,“ sagði Sigurður Guðmundsson, smitsjúkdómalæknir og fyrrverandi landlæknir, í samtali við Bítið á Bylgjunni í morgun. Vísir fjallar um viðtalið við Sigurð.
Eins og komið hefur fram hefur Kári Stefánsson, forstjóri Íslenskrar erfðagreiningar, tilkynnt að fyrirtækið muni hætta að skima fyrir kórónuveirunni sem veldur COVID-19 næstkomandi mánudag.
Sigurður segir að nú sé tækifæri til að endurskoða umræddar skimanir og jafnvel hætta þeim með öllu.
„Við erum búin að skima núna 22 þúsund manns og það hafa komið kannski í mesta lagi 5-6 sem við getum talið vera virk smit út úr þeirri leit. Þetta hefur kostað okkur 350-400 milljónir. Að vísu borgað líklega af Íslenskri erfðagreiningu að mestu leyti, en þetta eru engu að síður fjármunir.“
Sigurður vill meina að frekar ætti að prófa þá sem eru með einkenni og ráðast í smitrakningu. Þá væri hægt að setja fólk frá löndum þar sem faraldurinn geisar af fullum þunga í tveggja vikna sóttkví. Nefnir hann í því samhengi lönd eins og Bandaríkin, Brasilíu, Indónesíu og Svíþjóð.
