„Maður er manns gaman og fátt kemur í staðin fyrir mannleg samskipti í raunheimum. Það er þó vel hægt að blanda saman samskiptum og samvinnu manna með heimavinnu og mætingu á vinnustað með ótrúlega jákvæðum áhrifum á umferð, umhverfi og rekstur fyrirtækja og stofnana.“
Þetta segir Sigurður Ingi Friðleifsson, framkvæmdastjóri Orkuseturs, í athyglisverðri grein á vef Vísis. Sigurður bendir á að veirufaraldurinn hafi hrist upp í viðhorfi fólks til heimavinnu, enda hafa ófáir þurft að sinna vinnu sinni heiman frá sér í ástandinu sem nú ríkir. Og í flestum tilfellum hefur það reynst vel.
„Gamaldags viðhorf um að allir verði að safnast saman á miðlægan stað til að klára öll þau verkefni sem liggja fyrir, er nú að víkja fyrir augljósum möguleikum fjarvinnu. Tæknin var reyndar löngu tilbúinn fyrir slíka breytingu en menningin hafði víðast hvar staðnað við eldra fyrirkomulag. Þær takmarkanir sem settar voru á, í kringum opinberar veiruvarnir, ýttu við mörgum sem hingað til höfðu hikað við uppbrot á íhaldssömu vinnuumhverfi.“
Sigurður segir að heimavinna hafi ekki bara jákvæð áhrif í núverandi ástandi vegna veirunnar, heldur einnig til að draga úr losun gróðurhúsalofttegunda og vaxandi umferðarteppum.
„Stór hluti umferðar er tilkomin vegna ferða til og frá vinnu. Þó að stór hluti starfa sé háður mætingu þá er ótrúlega stór hluti ekki háður mætingu. Samkvæmt bandarískri rannsókn væri hægt að sinna allt að 50% nútíma starfa heiman frá. Ef að atvinnurekendur myndu aðeins nýta brot af þeim möguleika, þá væri hægt að ná miklum árangri í að draga úr umferð og þar með mengun. Þetta þyrfti ekki endilega þýða að vinnuafl hyrfi gjörsamlega frá vinnustöðum heldur mætti blanda saman heimavinnu við hefðbundna mætingu og ná þannig fram fækkun ferða,“ segir hann.
Sigurður bendir á að vegasamgöngur séu stærsti losunarvaldur gróðurhúsalofttegunda sem falla beint undir ábyrgð stjórnvalda.
„Ef heimavinna gæti dregið úr umferð sem nemur aðeins 1 prósenti hjá bensín- og dísil akandi starfsmönnum þá myndi losun gróðurhúsalofttegunda minnka um allt að 10 milljón kg á ári.“