Sigrún Katrín Kristjánsdóttir kveðst vera steinhætt að kaupa kjúklingabringur dýru verði eftir að hafa rekist á myndband á YouTube. Hún kveðst geta sparað sér töluverðar fjárhæðar með ráðinu sem útlistað er nánar hér að neðan.
„Sauðurinn ég hef hingað til verið að kaupa 4 kjúklingabringur í pakka fyrir yfir 2000 kall,“ segir Sigrún í Facebook-hópnum Sparnaðartips en hún gaf Hringbraut góðfúslegt leyfi til að fjalla um málið.
Hún kveðst hafa rekist á myndband um hvernig á að skera niður kjúkling og ákvað hún að prófa að kaupa sér heilan kjúkling í kjölfarið. Fyrir valinu varð kjúklingur í verslun Krónunnar sem kostaði 800 krónur.
„Ég hef aldrei skorið niður hráan heilan kjúkling áður og það tók mig ca 5 mínútur,“ segir Sigrún en herlegheitin tóku hana heilar tólf mínútur með þrifum og frágangi.
„Þetta þýðir að ég get keypt tvo heila kjúklinga fyrir miklu minni pening en ég hef verið að eyða í bringur, og fengið þannig 4 bringur fyrir 1.600 krónur, en síðan líka fullt af lærum og vængjum ókeypis með,“ segir hún. Hún segir að umræddur kjúklingur hafi verið 1,7 kíló og hann hafi, eins og áður segir, kostað 800 krónur.
„Nú mun èg aldrei aftur kaupa annað en heilan kjúkling, en ég fattaði þetta nokkrum áratugum of seint og tapaði stórfé á því. Pósta þessu því hér sem víti til varnaðar fyrir aðra sem eru haldnir sama rándýra misskilningnum og ég,“ segir hún.
Nokkrar athugasemdir hafa verið skrifaðar við færsluna og virðast flestir vera hrifnir af ráðinu. Þá koma meðlimir einnig með gagnlegar upplýsingar sem fólk getur nýtt sér.
„Sama lögmál með kjöt af öðrum dýrum, alltaf ódýrast að vinna kjötið sjálfur. Góð myndbönd á youtube td hvernig á að bera sig að við lambakjöt,“ segir ein kona í þræðinum á meðan önnur bætir við:
„Þetta hef ég líka gert, finnst eiginlega bara gaman að úrbeina kjúkling. Mjög gott að úrbeina tvo í einu og setja bringur i einn rennilásapoka og læri og vængi í aðra og frysta. Kjúklingaskipið (beinagrindin) er gott að steikja/sjóða til að fá kraft í súpu.“
Myndbandið sem Sigrún horfði á og deildi með meðlimum Sparnaðartips má sjá hér að neðan. Þá má sjá myndir af afrakstrinum hjá Sigrúnu að verki loknu.