Sigríður Andersen, fyrrverandi ráðherra, segir að sóttvarnaraðgerðir stjórnvalda séu í sívaxandi mæli orðnar pólitískar. Vísar hún í viðtal sænska dagblaðsins Aftonbladetvið Angelique Coetzee, lækni í Suður-Afríku sem bar kennsl á Ómíkron-afbrigði Covid-19.
Coetzee sagði að hún væri hissa á viðbrögðum heimsins við afbrigðinu. „Enginn hér í Suður-Afríku hefur lent á sjúkrahúsi vegna Ómíkron. Það er ekkert sem bendir til þess að neinn hafi orðið alvarlega veikur af því,“ sagði hún.
Þórólfur Guðnason sóttvarnalæknir sagði í vikunni að það væri rétt af alþjóðasamfélaginu að bregðast hart við Ómíkron-afbrigði kórónuveirunnar sem hefur gert sig gildandi að undanförnu.
Sigríður segir að hún sé sammála Coetzee. „Ég er sammála lækninum sem uppgötvaði Omikron afbrigðið um að viðbrögðin við þeirri uppgötvuun séu til skammar,“ segir hún á Twitter. „Sóttvarnaaðgerðir eru í sívaxandi mæli orðnar pólitískar.“
