Sigríður Á. Andersen, þingmaður Sjálfstæðisflokksins, telur að ríkisstjórnin þurfi að færa ríkari rök fyrir því að tilefni hafi verið til að herða aðgerðir á landamærunum. Eins og tilkynnt var í gær verða framvegis allir þeir sem koma til landsins að fara í skimun við komuna, síðan í fjögurra til sex daga sóttkví og þá í aðra skimun.
Ferðaþjónusta landsins hefur gagnrýnt þessa ákvörðun harðlega og segir Sigríður að lítið fari fyrir grundvallarmannréttindum í umræðu um sóttvarnaaðgerðir. Þetta sagði hún í samtali við mbl.is í dag.
Hún segist sjálf myndu hafa kosið að fara minna íþyngjandi leið fyrir ferðaþjónustuna. „Ég hefði gert það. Ég held að fólk þurfi að færa ríkari rök fyrir því að aðstæður kalli á svona drastískar aðgerðir. Ég hefði frekar kosið að stjórnvöld væru í samskiptum við önnur ríki og hvettu til meira jafnvægis,“ segir hún.
Hún furðar sig þá á því að eftir að faraldurinn hafi verið í gangi í eitt og hálft ár séu sóttvarnaaðgerðir enn ekki komnar inn á borð löggjafans.
