„Það eru um 1600 manns, heilbrigt, í sóttkví. 20, ólasið að mestu, í einangrun auk verulegra hafta á landamærum (sem litlu hafa skilað?). Það er ekkert ,,eðlilegt” við líf sem er undir stöðugum hótunum um helsi,“ segir Sigríður Andersen, þingmaður Sjálfstæðisflokksins og fyrrverandi dómsmálaráðherra í færslu á Twitter.
Víðir Reynisson, yfirlögregluþjónn hjá almannavörnum, sagði í samtali við Fréttablaðið að staðan væri alvarleg í ljósi mikilla Covid-smita síðustu daga.
Kári Stefánsson, forstjóri Íslenskrar erfðagreiningar, sagði svo í samtali við Fréttablaðið að 99,5% þeirra sem smitast og eru bólusettir veikist ekki alvarlega. „Tölfræðilega séð lítur þetta út þannig að fyrir bólusetningu lentu 5% þeirra sem smituðust á Íslandi á spítala. Við erum núna með bóluefni sem veita svona upp undir 90% vörn. Þannig má reikna með því að 0,5% lendi á sjúkrahúsi og tölurnar fram til dagsins í dag passa við það,“ sagði Kári.
Víðir sagði ástandið vonbrigði. „Þetta er langt frá því að vera það sem við áttum von á. Það eru vonbrigði að bólusetningarnar séu ekki að virka betur en þetta, ég held að allir hafi reiknað með því að þær myndu koma í veg fyrir svona hluti. Við áttum alveg von á því að einn og einn myndi smitast en svona stór og ný bylgja er ekki það sem neinn átti von á held ég.“
Sigríður ber saman orð Kára og Víðis á Twitter og segir:
„Nei hættu nú Víðir. ,,..ekki að virka betur en þetta”. Þetta hvað? 99,5% vörn? Er ekki tími til kominn að fara að lifa lífinu í stað þess að bíða eftir dauðanum?“