„Nú er ljósmyndin notuð til að heimfæra kynþáttahyggju á alla lögreglumenn. Það er illa gert og ber vott um augljósa fordóma þeirra sem slíkt gera,“ segir Sigmundur Davíð Gunnlaugsson, formaður Miðflokksins, á Facebook-síðu sinni.
Þar gerir hann fánamálið svokallaða að umtalsefni en mynd af íslenskri lögreglukonu með Vínlandsfánann svokallaða á búningi sínum vakti mikla athygli. Sigmundur Davíð kemur lögreglukonunni til varnar þó hann sé þeirrar skoðunar að búningar lögreglumanna ekki að bera nein önnur merki en merki lögregluembættisins.
„Eitt helsta áhugamál ákafra ybba, austan hafs og vestan, nú um stundir er svo kölluð hneykslunarfornleifafræði. Þá er leitað mörg ár aftur í tímann að einhverju til að hneykslast á. Frægir grínistar hafa t.d. orðið fórnarlömb slíkra „rannsókna” þegar finnast gamlir brandarar eða tíst sem þykja ekki lengur viðeigandi. Þá er þó oft litið fram hjá samhenginu og merkingunni þannig breytt,“ segir Sigmundur sem snýr svo að málinu sem mikið hefur verið rætt um síðastliðinn sólarhring.
„Undanfarna daga hafa verið birtar fjölmargar fréttir um hátt í þriggja ára gamla mynd af lögreglukonu eftir að einhver rak augun í fánamerki á búningi hennar. Mest hefur verið hneykslast á svo kölluðum Vínlandsfána.“
Sigmundur segist vera mikill fánaáhugamaður en þrátt fyrir það hafi hann þurft að fletta Vínlandsfánanum upp.
„Það tekur þó ekki langan tíma að komast að því að hönnun fánans hafði ekkert með kynþáttahyggju að gera. Fáninn mun uppruninn hjá bandarískri þungarokkhljómsveit og átti að tákna lífsskoðanir hins norræna forsprakka sveitarinnar, þ.m.t. sósíalisma og umhverfisvernd,“ segir Sigmundur Davíð og bætir við að síðan þá hafi margir hópar notað fánann.
„Þeirra á meðal eru Skógar-Finnar og áhugamenn um Vínland en einnig kynþáttasinnar,“ segir Sigmundur en um það hefur gagnrýninn einmitt snúist.
„Ég er reyndar þeirrar skoðunar að óviðeigandi sé að merkja lögreglubúninga með öðru en merkjum lögreglunnar. Það er hins vegar óhugnanlegt að sjá hvernig ráðist er á konuna sem mynduð var fyrir nokkrum árum með fánamerkið og henni gerðar upp alls konar hvatir.
Eins og jafnan færa svo ybbarnir sig upp á skaftið. Nú er ljósmyndin notuð til að heimfæra kynþáttahyggju á alla lögreglumenn. Það er illa gert og ber vott um augljósa fordóma þeirra sem slíkt gera.“
Eitt helsta áhugamál ákafra ybba, austan hafs og vestan, nú um stundir er svo kölluð hneykslunarfornleifafræði. Þá er...
Posted by Sigmundur Davíð Gunnlaugsson on Fimmtudagur, 22. október 2020