Sigurður Hlöðversson, betur þekktur sem Siggi Hlö, er einn þekktasti og vinsælasti útvarpsmaður landsins. Hann hefur stýrt þættinum Veistu hver ég var á Bylgjunni í mörg herrans ár og notið mikilla vinsælda.
Nú hefur Sigurður birt yfirlýsingu á Facebook-síðu sinni þar sem hann útskýrir hvers vegna hann spilar ekki lög með Michael Jackson – óumdeilanlega einum vinsælasta tónlistarmanni sögunnar.
Sigurður segir að nú þegar hrekkjavakan er framundan sé farið að bera á því að hlustendur biðji hann um að spila lagið Thriller með Jackson. Sigurður segist alltaf hafa sagt nei, lög með Jackson yrðu ekki spiluð á hans vakt. Segist hann stundum hafa fengið að heyra það frá hörðustu aðdáendum Jackson. Af því tilefni birtir hann svohljóðandi yfirlýsingu:
„Ég Siggi Hlö, útvarpsmaður, spila ekki lög með Michael Jackson í þætti mínum á Bylgjunni. Hann er að mínu mati barnaníðingur af verstu tegund og ég hef engan áhuga á að upphefja hann með því að spila lögin hans. Ég er ekki sammála þeim sem segja: „Það var aldrei neitt sannað á hann” eða „hann er svo stórt nafn í tónlistarheiminum” eða „hann á svo rosalega mörg þekkt lög”. Fyrir mér er engin afsökun á hans hegðun gangnvart ungum drengjum og þess vegna hef ég tekið þessa afstöðu, sem tveggja barna faðir, og bið hlustendur um að virða það við mig.“
Heimildarmyndin Leaving Neverland sem sýnd var á síðasta ári vakti gríðarlega athygli, en í henni er fjallað um meint kynferðisofbeldi Michael Jackson gegn ungum drengjum. Í myndinni var meðal annars sögð saga þeirra Wade Robson og Jimmy Safechuck sem voru börn þegar þeir umgengust Jackson þegar hann var á hátindi ferils síns. Báðir segja að Jackson hafi brotið gegn þeim kynferðislega.
Halloween er framundan og það er strax byrjað að biðja mig um að spila Thriller með Michael Jackson í þættinum mínum...
Posted by Sigurður Hlöðversson on Mánudagur, 26. október 2020