Sif Sigmarsdóttir, einn vinsælasti pistlahöfundur landsins, gerir Vinstri græn að umfjöllunarefni sínu í pistli í Fréttablaðinu í dag. Hún telur flokkinn eiga í pólitískri tilvistarkreppu, en samkvæmt nýjustu skoðanakönnun Gallup hefur fylgi Vinstri grænna ekki verið minna síðan 2013.
„Vinstri græn kunna að klóra sér í höfðinu yfir örlögum sínum. Ástæða hrakfara þeirra er hins vegar augljós. Katrín Jakobsdóttir, forsætisráðherra og formaður VG, átti í síðustu viku fund með leiðtoga hvítrússnesku stjórnarandstöðunnar. Stjórnarandstaðan í Hvíta-Rússlandi hefur gagnrýnt harðlega kjörræðismann Íslands þar í landi, Alexander Mosjenskíj, sem er náinn forseta landsins, Alexander Lúkasjenko, „síðasta einræðisherra Evrópu“ og helsta bandamanni Pútíns Rússlandsforseta. Ekki var þó rætt um stöðu hins umdeilda kjörræðismanns á fundinum og vildi Katrín ekki svara spurningum um persónulega skoðun sína á samstarfi Íslands og Mosjenskíj þegar blaðamenn Stundarinnar leituðu eftir því,“ segir Sif.
Sif bendir á að Katrín hafi ekki farið jafn leynt með skoðanir sínar í sömu viku þegar Hæstiréttur Bandaríkjanna felldi úr gildi fordæmisgefandi úrskurði Roe gegn Wade frá árinu 1973, sem bannaði ríkjum að takmarka rétt kvenna til þungunarrofs. Í færslu á samfélagsmiðlinum Twitter sagði hún að ákvörðun hæstaréttar þar ytra væru „gífurleg vonbrigði.“
„Ekki fylgdi þó sögunni hvað henni finnst um að dómsmálaráðherra hennar eigin ríkisstjórnar hafi kosið gegn nýlegu frumvarpi um aukna heimild kvenna á Íslandi til þungunarrofs,“ segir Sif. Hún líkir Vinstri grænum við leiðtoga Verkamannaflokksins í Bretlandi, Keir Starmer, sem hefur sætt gagnrýni fyrir að vera „litlaus.“ Það leiði til þess að of margir kjósendur hafi ekki hugmynd um hver hann er: „Hann þarf að skilgreina sjálfan sig áður en andstæðingar hans gera það,“ segir Sif.
Sif telur gjána orðin svo djúpa, milli orða Vinstri grænna og athafna þeirra, fagurra fyrirheita og ákvarðana ríkisstjórnarinnar sem þau heita að leiða, að kjósendur hafi ekki hugmynd um hver þau eru. Sif vitnar í pistil Illuga Jökulssonar á Stundinni, þar sem hann gagnrýnir Vinstri græn fyrir nýsamþykkta rammaáætlun.
„Rétt eins og flokkurinn hefur þegar sannað að hann er ekki lengur vinstrihreyfing með þjónkun sinni við efnahagsstefnu Sjálfstæðisflokksins, þá er morgunljóst að hann er ekki heldur grænt framboð,“ sagði Illugi.
Og Sif veltir fyrir sér. „Kannski eru Vinstri græn einfaldlega ekki til.“