„Þegar ég tók við í desember var ég með draumalið á blaðinu mínu, það eru tveir leikmenn eftir af því. Formaðurinn er horfinn á braut, stjórnin er horfin á braut. Ég þarf að ráðfæra mig við yfirmann knattspyrnumála, sem er ég sjálfur,“ sagði Arnar Þór Viðarsson landsliðsþjálfari í knattspyrnu karla, í belgíska sjónvarpsþættinum Extra Time. Þar ræddi hann um meint ofbeldismál sem urðu til þess að formaður og stjórn KSÍ sagði af sér og nokkrir leikmenn eru ekki í liðinu.
Arnar Þór var spurður út í mál Gylfa Sigurðssonar:
„Ég get ekkert tjáð mig um málið, en sem þjálfari sakna ég auðvitað Kevin De Bruyne eða Eden Hazard Íslands. Hetjurnar fyrir nokkrum árum eru skyndilega útmálaðar sem hræðilegar manneskjur,“ sagði Arnar. „Ég skil gagnrýnina og fólkið sem tjáir sig um þetta en ég hef engin svör.“
Aktívistinn Sema Erla Serdar fer hörðum orðum um Arnar Þór á Twitter vegna viðtalsins, þá sérstaklega um ummælin um Gylfa Þór. „Maðurinn sem um ræðir liggur undir grun um kynferðisbrot gegn barni. Hvað er að þessum manni?“