Færsla um andlát ungrar íslenskrar konu í kjölfar bólusetningar hefur farið eins og eldur í sinu síðastliðna viku en í færslunni er haldið fram að hún hafi látist fjórum tímum eftir að hafa fengið bóluefni við Covid-19.
Maki konunnar ákvað að stíga fram inn á Facebook hópnum Covid19 – opin umræða þar sem hann leiðrétti rangfærslurnar. „Vil bara taka fram að það er verið að dreifa röngum upplýsingum um konuna mína heitna,“ skrifaði makinn.
Hann sagði að barnshafandi konan sín hafi ekki farið í bólusetningu, en að hún hafi látist eftir að blóðtappi myndaðist í lungum hennar þann 17. maí síðastliðinn. „Hún vissi að hún mátti ekki fara í bólusetningu fyrr en hún var komin 20 vikur á leið, en hún var bara komin 19 vikur.“
Hann greinir einnig frá því að bæði aldur konunnar og aðrar upplýsingar um hana hefðu verið rangar í færslunni. „Vil biðja ykkur um að taka ekki mark á þessu rugli og ekki vera að dreifa þessu.“
Í umræddri færslu kom fram að konan hafi látist úr blóðtappa í heila fjórum klukkustundum eftir að hún hafi verið bólusett gegn Covid-19. „Aldrei bólusetja óléttar konur,“ stóð yfir mynd af konunni þar sem rangur aldur hennar var birtur.
