Samkvæmt Vísi kviknaði eldurinn í Kaldaseli í byrjun vikunnar út frá kannabisræktun.
Rannsókn stendur yfir um hvers vegna eldurinn kviknaði en Vísir segir að bráðabirgðaniðurstöður bendi til þess að kviknað hafi í húsinu á hæðinni þar sem kannabisræktun fór fram. Einn mun hafa verið yfirheyrður af lögreglu.
Haraldur Rafn Pálsson, eigandi hússins, sagði í opinni færslu á Facebook í gær að hann væri mjög þakklátur að ekki fór verr.
„Þessi atburður markaði mikil og djúpstæð áhrif á mig þar sem litlu munaði að ég yrði sjálfur bráð eldsins. Fyrir einhverja óskiljanlega ástæðu vaknaði ég uppúr værum svefni og náði naumlega að átta mig á aðstæðum og koma mér út, án teljandi meiðsla, fyrir utan væga reykeitrun og nokkrar skrámur. Aðeins nokkrar sekúndur réðu þar úrslitum og á tímabili hélt ég að þetta væru mín örlög og endir.“
Sjá einnig: Haraldur slapp naumlega úr brunanum í Breiðholti
Haraldur segist þó fyrst og fremst hafa skrifað færsluna til að biðla til fólks um að kanna stöðu mála á reykskynjurum og öðrum reykvörnum og gera viðeigandi ráðstafanir.
„Þetta er eitthvað sem engin á von á að gerist hjá sér en getur gerst fyrir alla. Eldsvoði gerir ekki boð á undan sér. Í öðru lagi langar mig að þakka öllum þeim sem hafa sent mér hugheilar kveðjur eftir atvikið eða sett sig i samband við mig - ég kann mikið vel að meta það. Að lokum vil eg taka fram að eg afþakka öll framlög og þess háttar en bið ykkur þess i stað að fjárfesta í ykkar eigin öryggi og hlúa að ykkar nánustu. Það er alls ekki sjálfgefið að eiga gott fólk i kringum sig.“