Diljá Mist Einarsdóttir, frambjóðandi Sjálfstæðisflokksins í Reykjavík norður og aðstoðarkona Guðlaugs Þórs Þórðarsonar utanríkisráðherra, segir tilraunir til þöggunar sem beinast jafnvel að æðstu handhöfum framkvæmdavalds vekja hjá sér óhug.
Þetta kemur fram í aðsendri grein hennar í Fréttablaðinu í dag. Nokkuð ljóst er að þar vísar Diljá til umræðunnar um sóttvarnarreglur vegna COVID-19 og afstöðu Sjálfstæðismanna. Eins og Hringbraut greindi fráhjólaði Svandís Svavarsdóttir, heilbrigðisráðherra í samráðherra sína í Sjálfstæðisflokknum.
Sjá einnig: Áslaug svarar fyrir sig og sendir Svandísi pillu
Diljá ræðir mannréttindabaráttu í grein sinni í Fréttablaðinu.Hún segir flesta meðvituð um jafnréttisbaráttuna og baráttuna gegn mismunun.
„Allir sem hér búa og hingað koma fá sömu skilaboð og lúta sömu kröfum. Það er hvorki gestrisni né umburðarlyndi fólgið í því að gefa afslátt af þeim kröfum um jafnrétti og mannvirðingu sem við gerum alla jafnan.“
Þá segir Diljá að einhverju leyti farið að fenna yfir spor brautryðjendanna fyrir mannréttindum líkt og tjáningar-, athafna- og ferðafrelsi. „Þá er hætt við að við verðum værukær. Við erum aldrei í eins mikilli hættu á að glata frelsinu og þegar við tökum því sem sjálfsögðu. Fjölmiðlafrelsi er sömuleiðis burðarstoð í lýðræðisríkjum og hlutverk fjölmiðla gríðarlega mikilvægt.“
Segir hún mikilvægt að fjölmiðlar standi undir þessari ábyrgð með gagnrýnni fréttamennsku. Segir hún þetta sértaklega mikilvægt á tímum upplýisngaóreiðu og útbreidds og viðvarandi hræðsluástand, ljóst er að þar vísar Diljá til COVID tímans.
„Þegar gengið er mjög nærri borgaralegum réttindum og frelsi fólks yfir lengri tíma er ekki aðeins mikilvægt, heldur nauðsynlegt, að stöðug og opin umræða fari fram um nauðsyn skerðinga. Fyrir þeim þurfa að vera vel ígrundaðar og veigamiklar ástæður og mikilvægt að öll sjónarmið komi fram. Ekki aðeins rök þeirra sem telja sig sjálfir nógu mikla sérfræðinga. Því vekja tilraunir til þöggunar sem beinast jafnvel að æðstu handhöfum framkvæmdavalds óhug. En ef við höfum eitthvað lært af sögunni þá er það það að stjórnvöld eru treg til að skila valdi sem þau hafa tekið sér og við þurfum að veita þeim stöðugt aðhald. Það er almannaheill.“
Grein Diljáar í Fréttablaðinu.