Jón Steinar Gunnlaugsson, lögmaður, gagnrýnir sóttvarnaaðgerðir yfirvalda í pistli í Morgunblaðinu í dag og segir enga ástæðu til að loka fólk inni og loka fyrirtækjum vegna Omíkron-afbrigðis kórónuveirunnar. Þá gagnrýnir hann lækna sem vilja hafa strangar sóttvarnig og spyr hvort það sé ekki bara gert til að fá meira fjármagn inn til Landspítalans.
„Þar með liggur fyrir að vel yfir 99% af þeim sem smitast verða lítt eða ekki veik. Samt er haldið áfram að skerða frelsi manna í stórum stíl. Atvinnufyrirtækjum er lokað og einstaklingum er bannað að fara út úr húsi. Þetta er allt saman fullfrískt fólk sem stjórnvöld segjast beita þessu valdi til að forðast útbreiðslu smits. Beitt er hræðsluáróðri til að halda þessum stjórntökum uppi. Talað er um að „hópsmit“ sé yfirvofandi, án þess að gera grein fyrir hættunni sem af því á að stafa. Það er eins og sumir læknar telji sjálfsagt að beita menn þessu valdi. Þeir viti betur en sauðsvartur almúginn hvað honum er fyrir bestu. Samt eru það gömul og ný sannindi að bestu varðmenn hagsmuna einstaklinga eru þeir sjálfir,“ segir Jón Steinar í pistlinum.
Hann segir enga þörf til að beita slíkum brögðum til að hindra útbreiðslu Covid vegna þess að því fylgir svo lítil áhætta, að hans mati, að smitast.
„Kannski er bara best að sem flestir smitist af veirunni sem nú orðið má telja saklausa. Þannig hlýtur svonefnt hjarðónæmi að nást fyrr en ella,“ segir Jón Steinar í pistlinum.
Þar segir hann sóttvarnaaðgerðir hafa eyðilagt Evrópumótið í handbolta sem nú fer fram þar sem smitaðir leikmenn þurfa að halda sig inni á herbergi og mega ekki spila, fullfrískir.
„Hér er allt of miklu fórnað fyrir lítið. Persónulegt frelsi með ábyrgð telst til þeirra lífshátta sem við viljum viðhafa. Látum ekki einsýna lækna villa okkur sýn. Kannski eru þeir bara að búa til stöðu sem þeir telja að þrýsti á um hærri framlög úr ríkissjóði (les: frá skattgreiðendum) til Landspítalans? Hlustum frekar á þá virðingarverðu starfsbræður þeirra sem vilja ekki taka þátt í þessu ofríki og mæla með afléttingu valdbeitingarinnar,“ segir Jón Steinar að lokum.
Pistillinn er einnig aðgengilegur á vefsíðu hans hér.