Héraðsdómur Reykjaness hefur dæmt karlmann í þriggja mánaða skilorðsbundið fangelsi fyrir stórfellda líkamsárás. Árásin hafði í för með sér alvarlegar afleiðingar fyrir fórnarlambið.
Atvikið átti sér stað aðfaranótt laugardagsins 24. nóvember 2018 fyrir utan ónefndan skemmtistað. Samkvæmt ákæru veittist maðurinn að öðrum manni og ýtti við honum með þeim afleiðingum að viðkomandi skall með hnakkann í götuna. Hlaut hann höfuðkúpubrot, blæðingu inn á heila og brest í beinhimnu sem leiddi til þess að bragð- og lyktarskyn skertist og hann missti heyrn á hægra eyra.
Árásarmaðurinn játaði sök afdráttarlaust fyrir dómi en hann hefur ekki áður orðið uppvís að refsiverði háttsemi svo kunnugt sé. Í niðurstöðu dómara kemur fram að brot ákærða hafi ekki verið sérstaklega hættulegt í skilningi almennra hegningarlaga, en þegar virtar séu afleiðingar árásarinnar verði hún heimfærð undir það lagaákvæði.
„Ákærði hefur því í máli þessu verið sakfelldur fyrir stórfellda líkamsárás sem hafði í för með sér alvarlegar afleiðingar fyrir brotaþola. Ákærði hefur hins vegar gert samkomulag við brotaþola um greiðslu miskabóta sem hefur verulega þýðingu varðandi refsiákvörðun í málinu,“ segir í niðurstöðunni.
Fangelsisdómurinn yfir manninum er skilorðsbundinn til tveggja ára. Þá var hann dæmdur til að greiða málsvarnarlaun verjanda síns, 558 þúsund krónur og þóknun réttargæslumanns brotaþola, einnig 558 þúsund krónur.