Leikmaður Everton er sagður brjálaður eftir að hafa fengið fimm símtöl frá Gylfa Þór Sigurðssyni. Frá þessu greina miðlarnir Mirror og The Sun.
Breskir miðlar segja að leikmönnum Everton, þar sem Gylfi spilar, hafi verið bannað að eiga í samskiptum við hann eftir að Gylfi var handtekinn í síðustu viku vegna gruns um kynferðisbrot gegn barni. Gerð var húsleit á heimili hans en hann hefur verið látinn laus gegn tryggingu.
Þá hefur verið greint frá því að Gylfi haldi nú til í húsi á vegum Everton þar sem fylgst sé með honum.
Einn leikmaður Everton á að hafa „verið brjálaður yfir því að hafa fengið fimm símtöl“ frá Gylfa. Leikmennirnir séu ekki ánægðir með að hafa verið dregnir inn í málið og vilja að hann verði nafngreindur.