Saga Garðars svarar brjáluðum Fiskikóngi: „Ég vona að hann sé kominn upp úr því“

Söngkonan Saga Garðarsdóttir kom af fjöllum þegar hún var spurð út í reiði Fiskikóngsins Kristjáns Berg Ásgeirssonar út í nýja jólaplötu Atlantsolíu í þættinum Reykjavík síðdegis í gær.

Fiskikóngurinn var sjóðandi illur út í bensínstöðina í gær vegna samkeppninnar á jólalagamarkaðnum.

„Atlantsolía getur ekki hætt að herma!! Fokking óþolandi…(sorrí blótið),“ sagði hann. „Ég gef út eitt jólalag með Sverri Bergmann og þeir þurfa að gefa út heila plötu.“

Sjá einnig: Kristján Fiskikóngur lýsir yfir stríði

Saga, sem er rödd Atlantsolíu í auglýsingum og á plötunni, kannaðist ekki við lagið hans.

„Ég held að það sé svona þriggja ára gamalt beef. Ég vona að hann sé kominn upp úr því,“ sagði hún spurð út í reiði Fiskikóngsins.

Var henni svo bent á færsluna hans, þá sagði hún:

„Er hann líka búinn að gefa út plötu?“

Spurð frekar út í reiði hans svaraði hún.

„Við erum þá bæði komin í tónlistargeirann.“

Saga var svo spurð út í auglýsingarnar sem fara í taugarnar á mörgum:

„Ég er ekki alveg heilinn á bak við þetta. Ég er meira svona verkfæri, auglýsingalestrarkona eða söngkona. Þegar ég átti fyrst að syngja Baby Shark þá spurði ég: „Eru þið rugluð? Fólk á eftir að hata ykkur.“ En svo gerðum við þetta og það gerist alveg að þegar hlutir verða eftirminnilegir, þá rís salan. Svona hlutir virka. Mörgum þykir þetta mjög pirrandi en öðrum finnst þetta skemmtilegt.“