Sævar Helgi Bragason, vísindamiðlari og fjölmiðlamaður, náði að safna sér sautján milljónum króna á aðeins tveimur árum. Sævar var í áhugaverðu spjalli í þættinum Leitin að peningunum á vef Vísis.
Í viðtalinu kemur fram að Sævar hafi staðið á ákveðnum krossgötum þegar hann var 27 ára. Hann var þá nýskilinn við barnsmóður sína og þurfti að velja á milli þess að fara á rándýran leigumarkaðinn eða flytja aftur heim til foreldra sinna.
Sævar valdi skynsamari kostinn og flutti heim til foreldra sinna, enda vissi hann sem var að hann myndi lenda í vandræðum með að láta enda ná saman ef hann færi út á leigumarkaðinn.
Hann ákvað því að vinna eins og skepna, ef svo má segja, og má færa rök fyrir því að hann hafi verið í 200% vinnu um tíma, enda vaknaði hann sjö á morgnana og kom heim seint á kvöldin. Vann hann meðal annars við kennslu auk þess að sinna verkefnum og fyrirlestrum. Tveimur árum síðar var hann kominn með 17 milljónir í vasann.
Sævar viðurkennir að þetta hafi kostað töluverðar fórnir enda eyddi hann ekki peningum í vitleysu meðan hann var að safna. Til marks um það náði hann einn mánuðinn að halda heildarútgjöldunum undir 40 þúsund krónum. Þegar útborguð laun eru 600 til 700 þúsund krónur er upphæðin á bankareikningnum fljót að hækka.
Sævar segist lifa sparlega enn þann dag í dag og kaupir hann sér frekar fáa og vandaða hluti sem endast vel. Þá hjólar hann í vinnuna í stað þess að aka og tekur með sér nesti í stað þess að kaupa skyndibita eins og margir gera.
Viðtalið við Sævar má nálgast hér.
