„Getur einhver mér fróðari frætt mig hvers vegna við getum ekki allt eins farið í hina áttina, skapað hvata og lækkað verð á hollustuvörum, segjum þeim sem eru skráargatsmerktar, um 20%?“
Þessari spurningu varpar Sævar Helgi Bragason, ritstjóri Stjörnufræðivefsins og sjónvarpsmaður, á Twitter-síðu sinni.
Þar gerir hann umdeildar tillögur starfshóps sem heilbrigðisráðherra skipaði að umtalsefni, en hópurinn leggur til að álagning á sykraðar vörur hækki umtalsvert. Ef tillögurnar ná fram að ganga gæti verð á sætindum hækkað um tuttugu prósent.
Meðal þess sem hópurinn leggur til er að vörugjöld verði lögð á gos- og svaladrykki, íþrótta- og orkudrykki sem innihalda sítrónusýru, sælgæti, kex, kökur, sætabrauð og orku- og próteinstykki.
Sitt sýnist hverjum um þetta og fjallaði Hringbraut til dæmis um gagnrýni Vilhjálms Árnasonar, þingmanns Sjálfstæðisflokksins, á hugmyndina fyrr í dag.
Fjörugar umræður hafa átt sér stað undir færslu Sævars og bendir almannatengillinn Örn Úlfar Sævarsson á athyglisverðan punkt.
„Það er alveg mögnuð bylgja í gangi hjá neytendum gegn sykri - til dæmis hefur sala á sykruðum gosdrykkjum minnkað um tugi prósenta á undanförnum nokkrum árum. Þetta er þróun sem margar þjóðir sem hafa prófað sykurskatt með takmörkuðum árangri myndu öfunda okkur af.“
Getur einhver mér fróðari frætt mig hvers vegna við getum ekki allt eins farið í hina áttina, skapað hvata og lækkað verð á hollustuvörum, segjum þeim sem eru skrárgatsmerktar, um 20%? https://t.co/hpYdHR6cL9
— Sævar Helgi Bragason (@saevarhb) November 27, 2020