Óhætt er að segja að Sædís Ýr Jónasdóttir fari óhefðbundnar leiðir í fatahönnun. Hún útskrifaðist úr Listaháskóla Íslands í fyrra og í viðtali við mbl.is ræðir hún meðal annars þau nöfn sem hún hefur gefið sniðum sínum. Hún hefur vakið athygli fyrir flíkurnar sínar og hefur fjöldi áhrifavalda klæðst þeim.
Meðal þeirra nafna sem hún kaus eru Tussa, Mella og Kuntubjúga. Hún segir ástæðu nafngiftarinnar vera til að taka niðrandi orð sem notuð eru um fólk til baka. Hugmyndin kom frá mági hennar.
„Ég hugsaði mikið um hvað ég ætti að skíra sniðin mín og fór í nokkur heilaheljarstökk fram og til baka. Mágur minn stakk svo upp á því að taka niðrandi orð sem notuð eru um fólk, til baka. Þessi orð eru svo oft notuð til þess að brjóta okkur niður og það er svo brenglað hvað þessi orð geta farið fyrir brjóstið á manni. Í þetta skiptið tók ég til orð sem ég hef verið kölluð, hef tekið inn á mig og er að skila þeim til baka, fyrir mig og aðra í kringum mig, fyrir þig og mig. Við erum sterkari en við höldum,“ segir Sædís Ýr í samtali við mbl.is.
