Rúrik Gíslason hefur ekki svarað fyrirspurn Hringbrautar um orðróma þess efnis að hann hyggist taka þátt í Söngvakeppni Sjónvarpsins á næsta ári og þar með freista þess að taka þátt í Eurovision fyrir Íslands hönd.
Háværir orðrómar hafa verið uppi um að Rúrik beini nú sjónum sínum að þessari stærstu söngvakeppni veraldar í kjölfar mikilla sigra á stóra sviðinu í Þýskalandi og á Íslandi. Hringbraut sendi kappanum fyrirspurn í byrjun mánaðar vegna málsins en hefur ekki borist svör.
Eins og alþjóð man eftir skaust Rúrik upp á stjörnuhimininn í kjölfar þátttöku Íslands á HM þar sem Instagram fylgjendafjöldi hans rauk upp. Rúrik enda manna fallegastur.
Vart þarf að rifja það upp að Rúrik kom sá og sigraði á dögunum þýsku dansskeppnina Let's Dance og er hann orðinn að ofurstjörnu þar í landi. Úrslitaþátturinn fór fram í lok maí og dansaði Rúrik í búning þrumuguðsins Þórs ásamt félaga sínum, Renata Lusin, meðal annars við lag Davids Bowie, Let's Dance.
Rúrik getur ekki bara dansað heldur líka sungið. Það sýndi hann í vetur þegar hann gaf út lagið sitt „Older“ ásamt Doctor Victor. Hefur það ekki síst ýtt undir orðróma um að Rúrik hyggist taka þátt í Söngvakeppninni 2022 með eftirminnilegu popplagi, þar sem hann mun bæði syngja og dansa.
