Þann 1. janúar síðastliðinn voru 55.354 innflytjendur á Íslandi, eða 15,2% mannfjöldans. Þetta kemur fram í tölum sem Hagstofa Íslands birti í morgun.
Um er að ræða fjölgun frá því í fyrra þegar innflytjendur voru 14,1% landsmanna, eða 50.271.
„Fjölgun innflytjenda heldur því áfram en frá árinu 2012 hefur þeim fjölgað úr því að vera 8,0% mannfjöldans upp í 15,2%. Innflytjendur af annarri kynslóð fjölgaði einnig á milli ára, þeir voru 5.264 í fyrra en eru nú 5.684. Samanlagt er fyrsta og önnur kynslóð innflytjenda 16,8% af mannfjöldanum og hefur það hlutfall aldrei verið hærra. Einstaklingum með erlendan bakgrunn, öðrum en innflytjendum, fjölgaði einnig lítillega á milli ára og eru nú 7,0% mannfjöldans,“ segir í frétt sem Hagstofan birti á vef sínum.
Þar segir að innflytjandi sé sá einstaklingur sem er fæddur erlendis og á foreldra, báða afa og ömmur, sem öll eru fædd erlendis. Innflytjendur af annarri kynslóð eru einstaklingar sem fæddir eru á Íslandi og eiga foreldra sem báðir eru innflytjendur. Fólk er talið hafa erlendan bakgrunn ef annað foreldrið er erlent. Einstaklingur sem fæddist erlendis en á foreldra sem báðir eru fæddir hér á landi telst einnig hafa erlendan bakgrunn.
Eins og síðustu ár eru Pólverjar langfjölmennasti hópur innflytjenda hér á landi. Hinn 1. janúar síðastliðinn voru 20.477 einstaklingar frá Póllandi, eða 37% allra innflytjenda. Þar á eftir koma einstaklingar frá Litháen (5,9%) og Filippseyjum (3,8%). Pólskir karlar eru 39,3% allra karlkyns innflytjenda, eða 12.121 af 30.866. Litháískir karlar eru næst fjölmennastir (6,7%) og síðan karlar með uppruna frá Rúmeníu (4,4%). Pólskar konur eru 34,1% kvenkyns innflytjenda, næst á eftir þeim eru konur frá Filippseyjum (5,8%) og þá konur frá Litháen (5%).
Loks kemur fram að á árinu 2019 hafi 468 einstaklingar fengið alþjóðlega vernd. Aldrei hafa áður jafn margir fengið slíka vernd á sama árinu, en árið 2018 voru þeir 247. Flestir (155) höfðu venesúelskan ríkisborgararétt en þar á eftir komu flóttamenn með sýrlenskt ríkisfang (71). Nýjum umsækjendum á árinu fjölgaði lítillega frá árinu 2018. Þeir voru 813 árið 2019 samanborið við 731 árið 2018. Alls voru gefin út 2.105 ný dvalarleyfi til einstaklinga utan EES svæðisins á árinu 2019 samanborið við 1.952 árið 2018.