Flugdólgur hefur verið dæmdur til greiðslu sektar fyrir að láta öllum illum látum um borð í flugvél EasyJet sem var á leið til Íslands þann 24. september síðastliðinn.
Maðurinn, John Evans, var mjög drukkinn þegar hann fór um borð í vélina á flugvellinum í Manchester á Englandi ásamt kærustu sinni.
Grímuskylda var um borð vegna kórónuveirufaraldursins og neitaði Evans að bera grímu þrátt fyrir ítrekuð tilmæli starfsfólks þess efnis. Reifst hann við aðra farþega og var mjög dónalegur við starfsfólk um borð í vélinni. Þá lét hann öllum illum látum þegar lögregla var kölluð á staðinn og hótaði að slá lögreglumenn í rot ef þeir létu hann ekki vera.
Málið var leitt til lykta fyrir breskum dómstólum í vikunni en þar kom fram að Evans hafi verið mjög ölvaður, óstöðugur á fótum og þvoglumæltur. Var hann dreginn frá borði áður en vélin hélt sína leið til Keflavíkur.
Úr varð að hann var dæmdur til að greiða 230 pund í sekt og 119 pund í sakarkostnað. Samtals gera þetta rúmar 63 þúsund krónur.
Lögmaður hans, Nikki Cochran, sagði fyrir dómi að skjólstæðingur hennar hafi misst stjórn á sér umræddan dag. Hann viðurkenni að hafa verið drukkinn og sýnt af sér ósæmilega hegðun. Þá kom fram í máli Nikki að hann sé ekki lengur með kærustu sinni eftir atvikið.