Styrmir Gunnarsson, fyrrverandi ritstjóri Morgunblaðsins, segir að samstarf núverandi stjórnarflokka hafi gengið svo vel það sem af er kjörtímabilinu að spyrja megi hvort nýtt Viðreisnartímabil sé að ganga í garð.
Styrmir veltir þessu fyrir sér á bloggsíðu sinni en með Viðreisnartímabilinu á hann við samstarf Alþýðuflokks og Sjálfstæðisflokks á árunum 1959 til 1971, samstarf sem stóð í þrjú kjörtímabil.
„Það sem ýtir undir að þetta gæti gerzt, er að jafnframt hafa augljóslega skapast sterk tengsl við verkalýðshreyfinguna. Það hefur verið ljóst að þau væru til staðar á milli forsætisráðherra og forseta ASÍ, en þau hafa orðið traustari með ráðningu Höllu Gunnarsdóttur í starf framkvæmdastjóra ASÍ en hún starfaði áður um skeið í forsætisráðuneytinu,“ segir Styrmir.
Hann bætir við að ekki fari á milli mála að Ásmundur Einar Daðason, félags- og barnamálaráðherra, hafi einnig byggt upp náin tengsl við verkalýðsforystuna og þá sérstaklega þann arm hennar sem hefur orðið til á síðustu mánuðum.
„Þegar þetta tvennt fer saman, gott samstarf á milli stjórnarflokkanna og hins vegar traust tengsl við verkalýðshreyfinguna á erfiðum tímum hafa orðið til forsendur fyrir því, að samstarf þessara þriggja flokka geti spannað lengri tíma en kannski var búizt við í upphafi.
Í því felst ákveðin kjölfesta fyrir samfélagið.“