Ríkisstjórnin fundar nú á Egilsstöðum vegna versnandi stöðu faraldursins hér á landi. Ljósmyndari Hringbrautar smellti þessari skemmtilegu mynd af þremur ráðherrum ríkisstjórnarinnar á Reykjavíkurflugvelli áður en þeir stigu um borð í leiguþotu til Egilsstaða.
Á myndinni sjást þær Sjálfstæðisstöllur Áslaug Arna Sigurbjörnsdóttir, dómsmálaráðherra, og Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, sem hafa klætt sig í stíl fyrir fundinn.
Áslaug og Þórdís eru niðursokknar í skjal sem leiða má líkum að því að sé minnisblað sóttvarnalæknis sem hann skilaði af sér í gær.
Athygli vekur þó að Sigurður Ingi Jóhannsson, samgöngu- og sveitarstjórnarráðherra, sem er töluvert hversdagslegri í tauinu, virðist hafa fengið mun smærra minnisblað en kollegar hans úr Sjálfstæðisflokknum. Ef til vill er þó aðeins um að ræða kvittun fyrir flugmiðanum eða innkaupalista.