„Veiran sem herjar á heimsbyggðina veldur miklu fleiri áhrifum en sem nemur beinum veikindum og dauða. Fjöldi manns glímir við stöðugan ótta og lokar sig af. Sumir taka líf sitt,“ segir Reynir Traustason ritstjóri í pistli á vef Mannlífs.
Í pistlinum skrifar hann um aðgerðir yfirvalda vegna COVID-19 og það er skemmst frá því að segja að hann gerir athugasemdir við ýmislegt. Reynir bendir á að tölur lögreglu frá fyrri hluta ársins bendi til þess að sjálfsvígum hafi fjölgað mikið, eða um tæp 70 prósent.
„Það þýðir að fleiri hafa fallið fyrir eigin hendi en þeir sem deyja beinlínis vegna sjúkdómsins. 30 manns hafa svipt sig lífi það sem af er árinu 2020 en 18 manns, samkvæmt skráningu lögreglu á sama tíma í fyrra. Þetta nemur nemur 67 prósenta aukningu. Sem dæmi um alvarleika málsins er mannfallið tveimur fleira en þeir sem dáið hafa af völdum Covid-19 hérlendis,“ segir Reynir sem bætir við að Mannlíf hafi þráspurt landlækni, lögregluna og heilbrigðisráðuneytið um þessa auknu tíðni en engin svör fengið. „Látið er sem almenningi komi þetta ekki við,“ segir hann.
Reynir segir að fundir þríeykisins svokallaða séu stundum með skrýtnum brag og fátt standi eftir annað en tölur dagsins og að við séum öll almannavarnir.
„Yfirvöld leyna almenning þeim veruleika sem snýr að hliðaráhrifum Covid og forðast opinbera umræðu. Þöggun ríkir. Þríeykinu, að þeim ólöstuðum, þykir farsælla að þylja upp tölur um hve margir hafi mælst með þetta og hitt en að ræða kjarna málsins. Mannfall og sjálfsvíg er ekki til opinberrar umræðu. Launung hefur einnig hvílt yfir smitberum, sem meðvitað brjóta sóttkví, og þeim stöðum sem hafa reynst vera gróðrarstía fyrir veiruna.“
Í pistli sínum segir Reynir að þjóðin eigi að vera þátttakandi í að móta stefnuna úr út kófinu og aftur til venjulegs lífs.
„Allar mögulegar upplýsingar um áhrif veirunnar, bein og óbein, eiga að vera uppi á borðum. Launungin þarf að víkja fyrir hreinskilni. Geislameðferðin sem þjóðin gengst undir má ekki verða til þess að deyða fleiri en sjálft meinið. Við verðum að fjarlægja kýlin, og hreinsa sárin til að geta grætt þau og fikra okkur svo út úr því miðaldamyrkri sem færst hefur yfir. Allt sem nú er að gerast mun ganga yfir. Þá þurfum við að gera upp málin.“
Hér er hægt að lesa pistil Reynis í heild sinni.