Lögreglan á höfuðborgarsvæðinu handtók í gær karlmann á þrítugsaldri í vesturbæ Reykjavíkur eftir að maðurinn hafði gert þrjár tilraunir til að ræna fólk vopnaður hníf. Engum varð líkamlega meint vegna málsins en íbúi í vesturbænum lýsir upplifun sinni af manninum á Facebook síðunni Vesturbærinn.
í færslunni greinir kona frá því að hún og maðurinn hennar hafi verið stopp á rauðu ljósi á Hringbrautinni þegar maðurinn kom upp að þeim. Að hennar sögn var maðurinn í annarlegu ástandi þegar hann óð upp að bíl þeirra, reif upp hurðina með hníf á lofti og beindi hnífnum að hálsi mannsins.
„Okkur var hrikalega brugðið,“ segir konan í færslunni og bætir við að maðurinn hafi verið mjög ógnandi og að hún hafi óttast að hann myndi stinga mann hennar. Þeim hafi þó tekist að ýta manninum í burtu frá bílnum og læsa hurðinni.
Að sögn konunnar var lögregla komin innan skamms auk víkingasveitarinnar og fékk parið að vita skömmu síðar að maðurinn hafi náðst. Hún segir það greinilegt að það þurfi alltaf að læsa bílnum sínum þegar maður er á ferð, meira að segja á Íslandi. „Ég hélt að svona gerðist bara í útlöndum.“
Að því er kemur fram í dagbók lögreglu veitta maðurinn ekki mótspyrnu við handtöku og hefur hann verið vistaður í fangageymslu í þágu rannsóknar mannsins.
