Regína Ósk Óskarsdóttir söngkona er enn að glíma við eftirköst COVID-19, fjórum mánuðum eftir að hún greindist með sjúkdóminn. Regína hefur myndað mótefni gegn veirunni en þó að hún sé almennt við góða heilsu í dag er ekki allt eins og það var áður.
Regína ræddi þetta í viðtali á útvarpsstöðinni K100 í morgun.
Það virðist æði misjafnt hvaða afleiðingar COVID-19 hefur á fólk, en í tilfelli Regínu missti hún bæði bragð- og lyktarskyn. Hún finnur þó mun á sætum, sterkum eða beiskum mat. Kveðst hún borða meira af sterkum mat nú en áður þar sem hún finnur meira bragð af honum.
„Nýjasta þróunin hjá mér, sem gerðist bara í síðustu viku, er að ég er farin að finna svona óbragð og ólykt í tíma og ótíma sem ég kalla núna COVID-bragðið og COVID-lyktina sem er svolítið ógeðsleg lykt,“ sagði Regína.
Hún fann fyrst fyrir þessu á dögunum þegar hún fékk sér Pepsi Max og taldi hún að drykkurinn væri skemmdur. Svo reyndist þó ekki vera enda fann hún sambærilegt bragð af papriku sem hún borðaði síðar.
Það eru ekki bara breytingar á lyktar- og bragðskyni sem Regína hefur fundið fyrir því hún segist einnig glíma við ákveðinn einbeitingarskort eftir veikindin. Þannig hafi hún lesið mikið áður en hún veiktist en eftir veikindin hafi hún lítið sem ekkert getað lesið.
Þá sagði Regína að hún væri í Facebook-hópi þar sem einstaklingar sem greinst hafa með COVID geta skipst á reynslusögum. Segist hún ekki vera sú eina sem glímir við þetta en læknar geta litlu svarað um hvað veldur.
