Óhætt er að segja að tvítugur piltur í Malasíu, Zackrydz Rodzi, hafi rekið upp stór augu þegar hann fór í gegnum símann sinn á sunnudag. Daginn áður hafði Rodzi týnt símanum sínum.
Í frétt BBC segist Rodzi hafa talið að einhver hafi stolið símanum – sá grunur reyndist á rökum reistur þó sökudólgurinn hafi ef til verið annar en hann bjóst við.
Á símanum voru myndir og myndbönd af apa sem virðist hafa tekið símann ófrjálsri hendi í skjóli nætur. Á einu myndbandi virðist apinn vera að reyna að borða símann.
Rodzi er búsettur í Batu Pahad í Johor-héraði í suðurhluta Malasíu en þannig vill til að fjölskrúðugt dýralíf er skammt frá heimili hans – skóglendi þar sem apar sveifla sér á milli trjáa til dæmis.
Það var svo á sunnudag að faðir Rodzi gerði tilraun til að hringja í símann þegar hann var staddur á veröndinni fyrir utan hús fjölskyldunnar. Heyrði hann símhringinguna skammt frá og fann hann símann að lokum. Þegar Rodzi skoðaði símann fann hann umrædd myndbönd.
Rodzi segist ekki vita til þess að apar hafi farið inn í hús á þessum slóðum, en hann grunar að apinn hafi laumað sér inn um opinn glugga og kippt símanum með sér.
