Ragnar Þór Ingólfsson, formaður VR, heimsótti flugfélagið Play á dögunum en boðið kom í kjölfar heldur neikvæðra skrifa hans um félagið.
Ragnar skrifaði færslu á Facebook á mánudag vegna fréttar Viðskiptablaðsins þess efnis að Bláfugl og Play gætu fyllt í skarðið færi svo að Icelandair yrði gjaldþrota.
Gerðu alvarlegar athugasemdir við færsluna
„Ég velti þeirri spurningu upp hvort þetta væri virkilega leiðin sem við vildum fara að fá hér flugfélög í skattaskjólsbraski sem veigri sér ekki við að úthýsa störfum til Indlans eða Filippseyja eða hverra landa sem réttindi og laun eru lægst fyrir mestu vinnuna? Setja svo restina á gerviverktöku í gegnum starfsmannaleigur? Þó ekki sé út frá flugöryggissjónarmiðum hlyti metnaður okkar að vera meiri en þetta.“
Ragnar segir að forsvarsmenn Play hafi í kjölfarið haft samband og gert alvarlegar athugasemdir við að vera kenndir við þá háttsemi sem hann lýsti. Þá sérstaklega hvað varðar flugöryggismál.
„Ég hafði sett mig nokkuð inn í viðskiptamódel Bláfugls en viðurkenni að ég hafði ekki kynnt mér það sama hjá Play enda félagið ekki flogið sína fyrstu ferð og því eingöngu hægt að álykta að svo stöddu.“
Ragnar segir að úr hafi orðið að forsvarsmenn Play buðu honum að koma í heimsókn og kynnast fólkinu og hugmyndafræðinni á bakvið félagið. Ragnar segist að sjálfsögðu hafa þegið það boð enda ekki annað í boði en að standa fyrir máli sínu sé þess óskað. Heimsóknin stóð yfir í um tvo klukkutíma þar sem Ragnar sat með stjórnendum og starfsfólki og fór yfir málin. Hann segir að heimsóknin hafi verið afar fróðleg.
Langt komið
„Ekki grunaði mig hversu umfangsmikil starfsemin er orðin, metnaðurinn, og kjörin sem félagsmenn okkar eru á. Það kom mér á óvart hversu langt þetta er komið en um 40 manns starfa hjá félaginu, margir með mikla reynslu af flugrekstri. Ég er ekki hafin yfir gagnrýni og viðurkenni fúslega ef ég hleyp á mig eða geri mistök. Eftir að hafa fundað með þessu kraftmikla og metnaðarfulla fólki varð mér ljóst að það voru mistök að tengja þessi tvö félög, Bláfugl (e. Bluebird Nordic) og Play, með þeim hætti sem ég gerði og harma ég það mjög.“
Ragnar segir að Play verði að njóta vafans að minnsta kosti þar til annað kemur í ljós.
„Ég spurði á fundinum hvort við gætum sannreint kjör og kjarasamninga starfsfólks félagsins í ljósi ýmissa fullyrðinga sem við höfðum innan úr verkalýðshreyfingunni og var það auðsótt mál og ekkert sem bendir til þess að hægt sé að bendla félagið við þau orð sem voru látin falla í færlsu minni þann 18.maí. “
Ragnar segist að lokum svo sannarlega vona að markmið forsvarsmanna Play um kjör þeirra sem munu starfa fyrir félagið standi og að eignarhald og fjármögnun félagsins verði opin og gagnsæ.
„Ég óska þessu dugmikla fólki alls hins besta. Ég vona líka að Icelandair haldi velli og hér muni ríkja heiðarleg samkeppni um flugsamgöngur, neytendum til mikilla hagsbóta og þúsundum starfa sem undir eru í íslensku samfélagi.“