„Skömmin er til að skila henni og nú er tækifærið.“
Þannig hefst nýjasti pistill verkalýðsforingjans Ragnars Þórs Ingólfssonar, formanns VR, á Facebook. Þar gerir hann efndir eða fremur skorts á efndum ríkisstjórnarinnar á Lífskjarasamningnum að umfjöllunarefni sínu en um það skrifaði hann grein sem birtist á Vísi í dag með fyrirsögninni „Áskorun“.
Hann segir það sé í „besta falli hálfur sannleikur“ að þinginu hafi ekki tekist að klára ýmis lykilmál er varða samninginn og vísar þar til orða Ásmundar Einars Daðasonar félagsmálaráðherra um að málin hafi dagað uppi í meðferð þingsins. „Þegar kerfisbundið var unnið gegn því að þau yrðu kláruð og þeim haldið í gíslingu fjármálaráðuneytisins svo mánuðum skipti?“ spyr Ragnar Þór.
Það sé ekki skrýtið að ekki takist að ljúka slíkum málum í þinginu ef þeim er haldið frá því eða komi ekki til umfjöllunar fyrr en skömmu fyrir þinglok.
„Ég kalla því eftir að Ásmundur komi hreint fram við kjósendur um hvar orsakir og afleiðingar liggja. Ég kalla eftir því vegna þess að þú stóðst þig vel og dróst vagninn fyrir okkur í mörgum málum. Kjósendur eiga skilið að vita hvar flöskuhálsinn og mótstaðan liggur. Við eigum rétt á að vita hvernig pólitíkin virkar og hverjir bera hina raunverulegu ábyrgð á svikum við kjósendur og verkalýðshreyfinguna.“
Ekki sé hægt að skrifa þetta á Covid-faraldurinn, nægur tími hafi verið til að klára málin. „Það veistu vel,“ skrifar Ragnar Þór.
