„Á meðan framlínufólk í heilbrigðiskerfinu, og í öðrum grunnstoðum samfélagsins, eru samningslaus og hafa jafnvel verið skert í launum á meðan álag hefur aukist gríðarlega gera embættismenn vel við sig og ætla að taka sér launahækkanir sem nema ríflega þriðjungi af því sem þeir lægst launuðu fá fyrir 100% starf.“
Þetta segir Ragnar Þór Ingólfsson, formaður VR, í færslu á Facebook-síðu sinni. Þar fjallar hann um launahækkanir þingmanna, ráðherra og ráðuneytisstjóra sem taka gildi í sumar. Vísir greindi frá málinu í morgun en þar kom fram að hækkunin sé afturvirk til 1. janúar.
Í frétt Vísis kom fram að þingfararkaup hækki um 69 þúsund krónur, laun forsætisráðherra um 127 þúsund krónur, aðrir ráðherrar um 115 þúsund krónur og ráðuneytisstjórar um rúmar 100 þúsund krónur. Til stóð að hækka laun forseta Íslands um 188 þúsund krónur en Guðni Th. Jóhannesson hefur afþakkað þá hækkun.
Á dögunum var greint frá því að til stæði að frysta launahækkanir sem byggðu á launavísitölu Hagstofunnar vegna ársins 2019. Ekki hafði komið til hækkunar launavísitölu fyrir árið 2018 og í frétt Vísis segir að það verði lagað í sumar.
„Á meðan 47 þúsund manns eru skráðir atvinnulausir að hluta eða öllu leyti og hafa tekið á sig umtalsverða kjaraskerðingu er það með öllu siðlaust að taka sér slíkar hækkanir í því ástandi sem nú ríkir og bara almennt séð siðlaust að taka sér meiri hækkun en þú ert tilbúinn að skammta öðrum,“ segir Ragnar Þór.
Ragnar Þór tekur fram að VR, ásamt þingmanninum Jóni Þór Ólafssyni, hafi stefnt ríkinu vegna ákvarðana kjararáðs á sínum tíma. Bendir hann á að hækkanir á almennum markaði hafi numið 18 þúsund krónum frá og með 1. apríl síðastliðnum.
