Einn besti kvikmyndagerðarmaður okkar Íslendinga, Ragnar Bragason, varð fyrir þeirri óvenjulegu reynslu á dögunum að sofna yfir kvikmynd. „Ef ég byrja að horfa á kvikmynd þá klára ég hana, hvort sem hún er góð eða léleg – en í þessu tilviki sofnaði ég,“ sagði Ragnar í Lestarklefanum, menningarþætti á Rás 1.
Myndin sem Ragnar vísar þarna til var frumsýnd á Netflix á dögunum og heitir I‘m Thinking of Ending Things. Charlie Kaufman, sem Ragnar heldur mikið upp á, er leikstjóri myndarinnar sem hefur fengið blendna dóma. Sumum þykir hún æðisleg, öðrum hörmuleg á meðan öðrum finnst hún bæði hundleiðinleg og heillandi, eins og kvikmyndagagnrýnanda Vísis.
Í viðtalinu sagðist Ragnar hafa beðið spenntur eftir myndinni og raunar talið niður dagana fram að frumsýningu. Var hann búinn að ýta á „play“ innan við hálftíma eftir að myndin kom inn á Netflix.
„Svo gerist eitthvað undarlegt. Ég tapaði alveg þræðinum og ég sofnaði yfir myndinni, sem er í annað skiptið á ævinni sem ég sofna yfir kvikmynd. Ég veit ekki hvort það sé bölvun eða hvað en ef ég byrja að horfa á kvikmynd þá klára ég hana, hvort sem hún er góð eða léleg – en í þessu tilviki sofnaði ég. Þegar ég vaknaði, dálítið undrandi yfir því að hafa sofnað, þá kláraði ég hana nú,“ sagði Ragnar sem sagði að myndin sé óþarflega flókin.
Á vefnum Kvikmyndir.is segir að myndin sé 134 mínútur að lengd og er söguþráðurinn – áhugaverður eða ekki – einhvern veginn svona:
„Þrátt fyrir að hafa efasemdir um sambandið, þá fer ung kona ásamt kærasta sínum í ferðalag á sveitabæ fjölskyldu hans. Þar sem unga konan er föst á bænum þegar blindbylur skellur á, ásamt foreldrum kærastans, Jake, byrjar hún að efast um allt sem hún vissi eða skildi um kærastann, sjálfa sig, og heiminn.“