Ragnar Árnason, hagfræðiprófessor emeritus, segir það ranga túlkun að segja að Borgarlínan sé þjóðhagslega hagkvæm. Í grein sem Ragnar skrifar í Morgunblaðið í dag fer hann yfir skýrslu Mannvits og danska ráðgjafarfyrirtækisins COWI um borgarlínuna, samkvæmt félagshagfræðilegrigreiningu er áætlað að fyrsta lota Borgarlínu skili 25,6 milljarða samfélagslegum ábata á næstu 30 árum, umfram stofn- og rekstrarkostnað.
Var notast við aðferðafræði sem beitt var meðal annars við m.a. Metro í Kaupmannahöfn, léttlestarkerfi í Óðinsvéum og Árósum. En þetta var í fyrsta skipti sem slíkt er gert fyrir stóra samgönguframkvæmd á Íslandi.
Ragnar segir að þjóðhagslegt núvirði fyrsta áfanga borgarlínu sé verulega neikvætt. Í skýrslunni séu reiknaðir til ábata ýmsir þættir sem séu alls ekki félagslegur ábati, eins og greidd fargjöld og „eitthvert metið hrakvirði framkvæmdarinnar í miðjum klíðum eins og hið opinbera geti þá selt fjárfestinguna til útlanda fyrir reiðufé“.
Ragnar segir að nýfjárfesting í þjóðvegum í Reykjavík hafu verið ví nær engin undanfarin 12 ár, en vegakerfi borgarinnar þess í stað skipulega gert ógreiðfærara með ærnum tilkostnaði. „Þjóðhagslegur kostnaður við þessar tafir er mjög mikill. Miðað við opinber gögn um umferð á höfuðborgarsvæðinu er hann líklega yfir 100 milljónir króna á hverjum virkum degi og yfir 30 milljarðar króna á ári,“ segir hann. Við það bætist loftmengun.
Hann segir að forsendur notkunar og þjóðhagslegt tímavirði óraunsætt. „Séu þær óraunsæju forsendur færðar í raunsæisátt kemur í ljós að framkvæmdin hefur verulega neikvætt núvirði,“ segir Ragnar.
Niðurstaða Ragnars er að Borgarlínan sé ekki skynsamleg. „Aldrei er skynsamlegt að leggja í framkvæmdir sem hafa neikvætt núvirði. Það er jafnvel álitamál hvort leggja beri í framkvæmdir sem hafa jákvætt núvirði. Slíkt er aðeins skynsamlegt ef engin önnur framkvæmd hefur hærra núvirði. Opinber gögn benda til þess að á höfuðborgarsvæðinu séu allmargar framkvæmdir í samgöngumálum sem bæði hafa verulega jákvætt núvirði og tvímælalaust miklu hærra en borgarlínan og munu nýtast öllum vegafarendum. Því væri skynsamlegt að framkvæma þessar samgöngubætur áður en meira skattfé er ausið í borgarlínu.“